Os aparellos eléctricos e electrónicos son aqueles que precisan de corrente eléctrica, pilas ou baterías para funcionar. Cando deixan de facer a súa función convértense en RAEE (residuos de aparellos eléctricos e electrónicos). Practicamente todos poden ser reciclados.

Os puntos limpos son centros de recollida e xestión de residuos xerados no fogar, entre eles os RAEE, que non teñen cabida nos colectores urbanos. Alí podes depositar, entre outros, monitores, televisores, grandes electrodomésticos, calefactores, aparellos de aire acondicionado, lavalouzas, lavadoras, fornos, móbiles, portátiles, impresoras, tabletas, aspiradoras, pranchas ou lámpadas. ESTRAEE transforma os puntos limpos en ecocentros para a mellora da xestión destes residuos.

ESTRAEE dota 18 puntos limpos dos medios necesarios para garantir unha correcta clasificación, almacenamento e tratamento dos residuos eléctricos e electrónicos. Ademais deseña unha ordenanza tipo, analiza o ciclo de vida dos materiais e crea unha bolsa de recursos e materias primas resultantes da xestión. Un correcto tratamento reduce emisións contaminantes, evita vertedoiros incontrolados e recupera materiais estratéxicos para novos usos, ademais de xerar emprego verde a través da economía circular.